टाबर की टूट नै जमा डुबा दी हरी पगड़ी आलेआं की पार्टी

हरी पगडी आलेआं के टाबर की टूट अर पार्टी की फूट नै हरी पगड़ी आलेआ की पार्टी जमा ई खत्म होण पै आ गी सै, चाचा-भतीजा म्हैं चौधर की जंग म्हैं ताऊ देवी लाल की राजनीतिक विरासत इब्ब खतरे म्हैं सै, न्यूं तो भतीजे नै अपणी न्यारी पार्टी बणा ली थी अर हरी पगडी आलेआं के कुछ नेता इसके गेल चले गए थे। इसी खातर इनकै समर्थक बी बंट गए थे। राजनीति म्हैं कब, क्यों अर क्युंकर दी जावै इसका बेरा कोन्या पाट्या करै पर न्यारी-न्यारी पाॢटयां के नाम तै प्रदेस म्हैं राजकरण आला ताऊ के परिवार की पार्टी का इसा हाल होना नी चइए था, इब्बी इनके दौरे गिनती के तीन विधायक ई बचे सै, जिस म्हैं तै एक चाया ई सै, तो इसी बात तै अंदाजा लगाया जा सकै कै आण आला टेम इनकी थातर किस तरैं का होवैगा। भतीजे की पार्टी की हालत बी कुछ घणी आच्छी कोन्या सै, बस उस गेल उसके कुछ समर्थक सैं अर चाचै तै बागी होकै आए दो चार विधायक सैं। पर इब्बी बी दोनूआं म्हैं खटास कम होण का नाम कोन्या ले रही सै। चाचा-भतीजा दोनूं एक-दूजे पै इब्बी बी शब्दां के बाण घणे तीखे कर-कर कै मारै सैं। इन म्हैं ना तो चाचा झुक रहै सै अर ना भतीजे की नाड़ नीचें हो रही सै। कुछ नेतावां नै लोकसभा की वोटां पाच्छों दोनूआं म्हैं सुलह कराण की कोशिश बी करी पर बात कोनी बणी। चाचा तो इब्ब मीडिया म्हैं कहण लाग गया सै के दोनूं टाबरां म्हैं कोई मनमुटाव कोन्या पर भतीजा इब्बी कसै ले बयान दे रहै सै तो बाकी तो टेम बतावैगा के फेर तै यो आपस म्हैं क्युंकर मिलैंगे।
     -(प्रस्तुति: मीनू शर्मा)