भगवांधारी सांसदां नैं हिरान कर रह्या सै शाह के फैल करण का डर

चंडीगढ़: हरियाणे में भगवाधारियां के सात सांसद हैं। पार्टी के बड्डे चौधरी शाह नैं इणका रिपोट कार्ड मांगकै कईयां कै पसीने छुड़ा दिए सैं। सारां नैं अपणे बोरिया बिस्तर लेकै दिल्ली आण का फरमान दे राख्या सै। शुक्रवार नैं इनमैं तैं किसनैं पास करैगा अर किसनैं फैल यो बेरा लाग जैगा। 

इनका एक सांसद तैं आगले इलैक्शनां मैं हार देखकै पहल्यां ऐ मैदान छोड़कै भागण की त्यारी करग्या सै। वो तैं इब बड्डे चुनावां तै बचके हरियाणे आले छोटे चुनावां में खड़े होण की बात कह रह्या सै। एक पहल्यां ही भगवां चोला छोड़कै नई पार्टी खड़ी करण की बात कह चुक्या सै। इब बचगै कुल मिलाकै पांच खागड़। इणमैं तैं भी एक-दो फैल कर दिए तैं पार्टी नैं आधे से घणे हरियाणे में दूसरे कंडीडेट खोजणे पड़ैंगे। 

जिण सांसदां नैं चुनावं जीत्यां पाच्छै चोखा काम कोनी कर्या उणनैं आगले चुनावां मैं टिकट ना देण की पूरी त्यारी कर राक्खी सै। शाह सहाब चाहवै सै अक इबकै पूरे हरियाणे में भगवां ही भगवां कर दे। काम ना करण आले सांसदां का ज्ञात पसीनां तैं इस बात नैं लेकै भीज रह्या सै के बेरा नैं यो बैरी शाह किस नैं पास करैगा अर किसनैं फेल। भाई यो जल्द बेरा लाग ज्यागा।