छोरे खातर बाब्बू नै पेश कर दिया सै अपणा इस्तीफा

भगवांधारियां नै दसों की दस सीटां पै अपणे उम्मीदवार उतार दिए सैं। एक सीट पै इन्नैं बडे बाप के छोरै नै टिकट दी सै। कदै हाथ आलेआं पै परिवारवाद का आरोप लाग्या करैं थे कै यू टिकट एक ई परिवार म्हैं देवैं पर इब्ब भगवांधारियां नै बी हिसार म्हैं इसा करया सै। इस आरोप तै बचण खातर इनके उम्मीदवार के बाब्बू नै अपणे मंत्री पद तै इस्तीफा पार्टी हाईकमान नै भेज दिया सै। न्यू तो यू पहल्यां ई कवै था कै जदै इसके छोरे नै टिकट मिल ज्यागी तो यू राजनीति तै संन्यास लेवैगा अर इसनै छोरे की टिकट पक्की होंदे ई करया बी इसा ई सै। चए इसका इस्तीफा मंजूर न होवै पर इसनै अपणी बात पै खरे उतर कै मिसाल तो पेश कर ई दी सै। दूजियां पाॢटयां आले तो इसनै बी राजनीतिक स्टंट कवैं कै इन्नैं बेरा सै कै इसका इस्तीफा मंजूर कोणी होवैगा यू तो बस हाथी के दिखाण आले दांत ई सैं। इब्ब टिकट तो मिल ग्या इब्ब नजर रवैगी नतीजेआं पै। छोरे के बाब्बू का जाट नेता होण का फायदा तो इन्नै मिल सकै सै। अर खट्टर साहिब का गैर जाट आला मुखड़ा बी कुछ हद तक काम म्हैं आ सकै पर इसी सीट पै इब्बी दूजियां पाॢटयां कै खागड़ उम्मीदवारों का ऐलान होणा बाकी सै फेर बेरा पाटैगा कै कौण कितणा दमदार सै।
 -(प्रस्तुति: मीनू शर्मा)