भगवांधारियां नै चुन लिए सै लोकसभा चुनावां खातर प्रभारी

चंडीगढ़(मीनू): लोकसभा चुनाव लवै आ रह्यै सै अर भगवांधारियां नै इस खातर अपणी तैयारी सुरू कर दी सै। इन्नै तो प्रदेस म्हैं चुनाव प्रभारी बी चुन लिया सै। इस तरैं कै काम म्हैं यू पाच्छै कोणी रवै सै। इस बार प्रदेस अर राजधानी म्हैं लोकसभा चुनावां म्है प्रचार की कमान दक्षिण हरियाणा के बडे नेता नै सौंपी सै। कुछ दिन पहल्यां ई दक्षिण हरियाणा तै ई पार्टी के अपणे विधायकां के बगावती सुर सुणन नै मिले थे। न्यू लाग्गै भगवांधारियां नै इसी बात नै ध्याण म्हैं राखदे होए प्रभारी चुणन म्हैं इतनी तौली मचाई सै। एक तरैं तै तो यू तौली इनकै खातर आच्छी वी सै। जितणा बी विरोध होणा होवैगा पहल्यां ई हो ज्यांगै।

हाथ आले इब्बी सोच ई रह्यै सैं कै उन्नै बी अपणे चुनाव प्रभारी चुणन म्हैं घणी मशक्कत करणी पडैगी। प्रदेस की राजनीति म्हैं पहल्यां ई घणे उतार-चढ़ाव हो रह्ये सैं। प्रदेस म्हैं कोई बी पार्टी इब्बी जातिगत समीकरण की बात कोणी कर रह्यी सै तो इब्ब तक तो न्यू लाग्गै कै इस बार चुनाव मुद्देआं पै होवैंगे अर इन मुद्देआं नै उठाण आले प्रभारी बी दमदार ई होणे चइए। बाकी टेम बतावैगा कै यू चुनाव  प्रभारी किस तरैं अपणी पार्टी नै आग्गै बढावैंगे।