Edited By Rakhi Yadav, Updated: 20 Jun, 2018 08:19 AM
हरियाणे का एक रिटायर्ड अफसर कई बै चार्जशीटां की मार झेल चुक्या सै। हुड्डा सरकार मैं इस अफसर नैं कदे कित्तै और कदे कित्तै भेज्या गया था। यो अफसर आपणे तबादलां तैं ही घणा हिरान हो लिया था। इब नौकरी के झंझट तैं इसनैं पूरा ...
चंडीगढ़: हरियाणे का एक रिटायर्ड अफसर कई बै चार्जशीटां की मार झेल चुक्या सै। हुड्डा सरकार मैं इस अफसर नैं कदे कित्तै और कदे कित्तै भेज्या गया था। यो अफसर आपणे तबादलां तैं ही घणा हिरान हो लिया था। इब नौकरी के झंझट तैं इसनैं पूरा छुटकारा पा लिया सै। लाल पगड़ी आले नैं इसनैं कांग्रेस के पाले में ल्या गेरा सै। कांग्रेस की सरकार में ही इसणै कसूत्ते दुख झेले थे।
इब इस पुराणे अफसर ने कांग्रेस मैं आयां पाच्छै कमल आल्यां की चार्जशीट बनाण का ठेका ठा लिया सै। बावल मैं किसानां की जमीन सरकार नैं लेण का प्रयास किया तैं यो ऐ खूंट ठोक अफसर इस मामले नैं देख रह्या था। जमींदारां नैं इस्सै अफसर के कामकाज पै जमकै सवाल ठाए थे। इब उस्से जमीन के मामले नैं उठाकै यो वाहवाही लूटण का काम कर रह्या सै।
यो दोनूं हाथ्यां में लाड्डू राखण का मन बणा रह्या सै। जिस सरकार म्हं खुद नैं हिरान हुआ बताया करदा उस्सै सरकार के पुराणे मुखिया के गुणगान भी भतेरे कर रह् या सै। अहीरां के इलाके पै फोकस करकै यो दो राव नैं इस मामले में चोक्खा दिखावण का काम करया सै। ये दोनूं राव इब कमल आली पार्टी मैं सैं। खुद हाथ पकड़ कै साइकिल पै चढ़ लिया सै।
गीत हुड्डा तैं लेकै इंद्रजीत अर नरबीर के भी गा रह्या सै। दिमाग इसका कसूता काम कर रह्या सै। बेरा नैं आग्गै चालकै किसके पाले मैं पड़णा पड़ ग्या। इब्बै तै इसकी मंशा इस्सी ऐ दिख रह्यी सै के इलैक्शनां धोरै जै कोई दूसरा मिल ग्या तैं उणकी गोदी मैं भी जाकै यो बैठ सकै सै। नौकरी पूरी हुयां पाच्छै इस इसकै राजनीति का कसूत्ता चस्का लाग्ग ग्या सै।