भैन जी का हरी पगड़ी आले भाइयां तै हो रहै सै मोह भंग

चंडीगढ़(मानू): टाबर की फूट अर पार्टी की टूट नै हरी पगड़ी आलेआं नै हिला कै रख दिया सै। पहल्यां तै भतीजेआं नै अपनी न्यारी पार्टी बना ली। इसतै इनके जमा पक्के जाट वोटां का बंटवारा हो गया अर समर्थक बी बंट गये। पहल्यां निगम चुनावां म्है फेर जींद उपचुनाव म्हैं मिली हार तै इनकी पार्टी की साख पै बट्टा सा लागया सै। भतीजेआं नै तो अपनी पार्टी बना कै दिल्ली आले वजीर गेल गठजोड़ कर लिया सै अर उपचुनाव म्हैं दूसरै नम्बर पै रह कै अपना दम दिखाया दिया सै। इबब हरी पगड़ी आलेआं स्यामनै मुशकल न्यू खडी हो गई सै के भैन जी का इनतै इब जी सा कोनी मिल रहै सै।

अर न्यू कवै कै इनकी आपसी फूट तै इनकी पार्टी कमजोर हो गई सै अर इननै तै समझौता इस खातर किया था कै यू चाचा भतीजे गेल इ सै पर इब्ब हालात बदल गये सै। अर वा तो इसपै विचार करैंगै। इननै अपनी पार्टी के कार्यकर्ताओं की बैठक बुला राखी सै। बैठक तो हरी पगड़ी आले बी कर ई रहै सैं। पर न्यू कोनी लाग्गै कै इब्ब बात बनैगी। भैन जी तो इन्नै छोड ज्यावैगी। ताऊ कै जन्मदिन पै कराई रैली का रौला इतना घना घमसान मचावैगा किसनै बेरा था। हरी पगड़ी आलेआं स्यामनै इब्ब पार्टी नै मजबूत करन अर दोबारा दमखम दिखान की चुनौती सै। बाकी तो आन आला टेम बतावैगा के इनका के बनैगा इबबी तो बातां ई सैं।