इबकी बार खानापूर्ति न बण जावै विधानसभा का शीतकालीन सत्र

चंडीगढ़(मीनू): प्रदेस सरकार 28 दिसम्बर नै विधानसभा का शीतकालीन सत्र बुला रह्यी सै। 28 नै शुक्रवार से अर सत्र सवेरे 11 बजे सुरू होवैगा। 29 अर 30 दिसम्बर नै शनिवार अर इतवार की छुट्टी रवैगी। शीतकालीन सत्र बुलाण की शुरूआत न्यू तो इसी सरकार नै की सै। इसतै पहल्यां विधानसभा का मानसून सत्र ई होया करै था। इबकी बार भगवांधारियां नै एक दिन का शीतकालीन सत्र चलाण की बात राक्खी सै। हो सै कै दूजियां पार्टियां आले इस सत्र नै 31 दिसम्बर नै बी जारी राखण की मांग कर सकै सै। 

इब्बै तो यू सत्र खानापूर्ति बण के रह जावैंगे। सरकार तो इस सत्र म्हैं अपणे बिल पास कराण का सोच कै बैठी सै। जदकि दूजियां पार्टियां आलेआं दौरे सरकार नै घेरण की तैयारी म्हैं सै। हाथ आले अर हरी पगड़ी आले किसानां का मुद्दा उठा सकै सैं। मौसम की मार तै खराब होई फसल का मुआवजा इब्ब तक किसानां नै कोणी मिल्या सै। यू मुद्दा इस सत्र नै हंगामेदार बणा सकै सै। सरकारी भर्ती म्हैं हो रही देरी बी दूजियां पार्टियां आलेआं खातर मुद्दा सै सरकार नै घेरण की। बाकी तो टेम बतावैगा कै शीत सत्र म्हैं कितणा गर्म होवैगा।