हाथ आली पार्टी टोलन लाग रही सै जित्तन आले उम्मीदवार

मीनू शर्मा: हाथ आली पार्टी नै इलैक्शनां खातर प्रभारी चुन लिया सै अर उसनै अपना काम संभाल बी लिया सै। उसकै आग्गै बी घनी बडी चुनौती सै जित्तन आलै उम्मीदवार ढुंढन की। विधानसभा चुनावां खातर बी इसनै प्रदेश के बडे नेतावां गेल मीटिंग बी कर ली सै। विधायकां गेल बी बैठकां का दौर चलाया सै अर उन्नै चुनाव प्रभारी तै कहै सै के पहल्यां मुख्यमंत्री पद के उम्मीदवार की घोशना करी जावै। न्यू तो यू मांग पहल्यां बी की गई थी। पर न्यू लाग्गै पार्टी हाईकमान इसपै इबी फैसला कोनी लेना चावै। इस तरै लोकसभा चुनावां खातर बी उम्मीदवारां के नाम पै चर्चा हो रही सै। इब पार्टी कोई जोखिम कोनी लेना चावै अर पैर दाब दाब कै चाल रही सै। सत्तासीन पार्टी नै मात देन खातर यू इसी रननीती बनाना चावै जिसतै यू पार्टी के अंदर की फूट बी पूरी तरै खत्म कर देवैं अर मैदान बी मार लेवैं। बाकी तो टेम बतावैगा के यू अपनै पत्ते किस तरैं खोलैंगै अर बाजी पलटैंगै।