Edited By Rakhi Yadav, Updated: 19 Jun, 2018 08:02 AM
हरियाणे के सेहत आला वजीर पीली पगड़ी आले चौधरी कै भूंडा पाछै लाग लिया लाग्गै सै। गुलाबी पगड़ी आला चौधरी पहल्यां ऐ घणी ही समस्यां का सामणां कर रह्या सै। माणेसर की जमीण आल्या सौद्दा इब्बै भी उसकै पाच्छै लाग रह्या ...
चंडीगढ़: हरियाणे के सेहत आला वजीर पीली पगड़ी आले चौधरी कै भूंडा पाछै लाग लिया लाग्गै सै। गुलाबी पगड़ी आला चौधरी पहल्यां ऐ घणी ही समस्यां का सामणां कर रह्या सै। माणेसर की जमीण आल्या सौद्दा इब्बै भी उसकै पाच्छै लाग रह्या सै। उसमैं सी.बी.आई. उसकै पाच्छै लाग रह्यी सै। कई और मामल्यां मैं भी इस्सा ऐ हो रह्या सै। लाग्गै सै आगले इलैक्शना तैं पहल्यां उसनैं जेल के भीत्तर ठोक दिया ज्यागा। इब खेल विभाग के वजीर नैं लॉन टैनिस कोच तैं बिना लिखत-पढ़त लाखां रुपयां का भुगतान करण का मामला ठा दिया सै। जांच विजीलैंस कै धौरै प्हुंचा दी सै। जिद किस्सै चीज की लिखत-पढ़त कै लाक्खां रुपया का भुगतान कर दिया।
दाढ़ी आले बाब्बे के हाथ में यो सौदा आ ग्या सै। दाढ़ी आले बाब्बे का कहण सै कोच नैं यो पैसा गुलाबी पगड़ी आले चौधरी नैं खेल सिखावण खात्तर दिया गया था। भाई टेम-टेम की बात सै कदै चौधरी का भी हरियाणे में डंका बाज्या करदा। इब बिचारा इस्से हाल मैं पहुंच ग्या सै अक उसपै ऐलम पै ऐलम लाए जा रह्ये सैं। यो बिचारा इब इणका जवाब भी देण के हाल मैं दिखता कोनी। खट्टर बाबा इस मामले मैं भी चुप्प बैठा दिखैसै। उसका हाल यो हो रह्या सै जै यो चौधरी जेल में गेर दिया तैं उसनैं कदे लोग्यां की सहानुभूति का फयदा कोनी मिल जा।
जाट खुलकै उसकै साथ आ ज्यांगे। अर जै बाहर छोड़ दिया तैं दूसरे दलां आले उसनैं बचावण का ऐलम लाकै खट्टर बाब्बे पै जमकै तीर चलावैंगे। ल्यो भाई इब देखांगे कि आग्गै चालकै खट्टर बाबा अर दाढ़ी आले बाबा के नया गुल खिलावैंगे।