इब कांग्रेसियां नैं आपणे ए हाल पै छोड़ दिया लाग्गै कुल्लू भाई

चंडीगढ़: खट्टर बाबा नैं कुल्लू भाई कै खिलाफ के बोल दिया, पूरे हरियाणे की राजनीति में तूफान सा आ ग्या सै। खट्टर के चेले उसकै पक्ष मैं खुलकर जबान चलावण लाग रे सैं। कुल्लू भाई आपणे घर आल्यां अर पुराणे हजकां आले तो उसका साथ दे रह्ये सैं पण कांग्रेस आल्यां नैं सांप सा सूंघ लाग्गै सै। जिद तैं कुल्लू नैं कांग्रेस का पंजा पकड्या सै जिद तैं कई कांग्रेसियां कै भी मरोड़ से लाग्ग रह्ये सैं। 

उणनैं यो डर लाग्ग रह् या सै के कदे ऊपर तैं कुल्लू नैं उणकै सर पै बैठाण का फरमान ना सुणा दिया जावै। पहल्यां गुलाबी गैंग आले भी कुल्लू के कांग्रेस मैं आण का चाव सा करदे दिक्खैं थे। इब उणनैं भी उसतैं किनारा सा कर लिया लाग्गै सै। कुल्लू एकदम तैं चुप्प बैठा सै। उसका चुप्प बैठणा भी कई कांग्रेसिययां भुंड़ा सेधण लाग्ग रह्या सै। 

उणनै यो बेरा सै अक लंबी जीभ आले सफेदपोश जब मुंह पै घणे ए दिनां तईं ताला लटकाया राक्खैं सैं तैं वे मुंह खोलते ही बड़ा धमाका कर देवैं सैं। बड्डी बात यो सै के सबतैं घणा जाड्डा उन चौधरियां कै चढ़ रह्या सै जो हरियाणे की चौधर अपणे हाथां मैं लेण के सुपने देख रह्ये सैं। भाई देखणा यो सै अक कुल्लू भाई आगै चालकै के नया करैगा।