खट्टर बाब्बै की इब्ब चाल पड़ी सै रथयात्रा

खट्टर बाब्बा की रथयात्रा पूरे प्रदेस म्हैं चाल रही सै गेल-गेल म्हैं यो रास्ते कै काम बी निबंटांदा जा रहै सै, लोग्गां नै बी मिल लै अर अपणी सरकार का प्रचार बी कर रहै सै। इसकी बातां म्हैं एक बात खास सै कै यो अपनी सरकार के बही खाते गेल हाथ आलेआं के खागड़ गुलाबी पगड़ी आले की सरकार का खाता भी दिया रहै सै। अपनी हर बात म्हैं यो कह दैवें के उसनै मुख्यमंत्री हौंदे यो किया अर भगवांधारियों की सरकार नै प्रदेस का पूरा विकास कराया सै। खट्टार बाब्बा अपणी यात्रा म्हैं मिलण आलै सारे लोग्गां तै आप मिलै सै चए वा रास्ते म्हैं खड़े बालक ई हो। यो सबनै मिलै अर उनतै उनके मन की बात जाणै सै। विधानसभा की वोटां तै पहल्यां इसकी यो यात्रा काढण का फैंसला बड़ा सोझी के लिया गया सैं, इसतै एक ओढ़ तो अपणी सरकार के सारे अधिकारों, विधायक स्यामणे मिल लेवै अर दूजा लोग्गां म्हैं यो संदेश बी जावै के उणका मुख्यमंत्री उनकै दौरे आप आवै। बाकी तो टेम बताया करैं के यो बात वोटां म्हैं कितणा फायदा देवैगी।
(प्रस्तुति: मीनू शर्मा)